මගේ නත්තල

හප්පේ... අද ගෙදර එද්දි 8.00ත් පහුයි... නත්තල හෙට නිසා අද වාහන තදබදයත් බොහෝම වැඩියි...කොහොම කොහොම හරි ඔන්න දැනුයි මම මගේ නත්තල් ගහ සරසලා අහවර වුනේ... අම්මයි තාත්තයි කතෝලික නොවන නිසා මම කතෝලික නොවුනට ආගමික උත්සව කාලවලදී මම අදාල ආගමික කෙනෙක් වෙනවා... ඒ මගේ ‍හිතේ සතුටට... ම‍ට මතක ඇති කාලේ ඉදන් අපේ ගෙදර නත්තල් දවස් ලං වෙනකොට නත්තල් ගහක් සැරසෙනවා..එහෙම කිව්වට ඉතිං මම ම තමයි හදන්නේ.. මතක විදියට මුලින්ම නත්තල් ගහක් හැදුවේ අපි පරණ ගෙදර ඉන්න දවස් වල..දියතලාවේ ඉන්න තාත්තාගේ යාළුවෙක් ඔස්කා මාමාට ලොකූ සයිප්‍රස් අත්තක් එවලා තිබ්බා නත්තලට..එක මුලින්ම ගෙනාවේ අපේ ගෙදරට.. ඒකෙන් පුංචි අත්තක් කපලා දාලා ගිහිං තිබ්බා... තාත්තා කඩෙන් ගෙනැල්ලා දුන්නු බැළුම් බෝලයි මට ලැබිලා තිබුනු නත්තල්, අවුරුදු හා වෙසක් කාඩ් සේරමයි මම ඒකේ එල්ලුවා මට මතකයි.. ඒක තමයි මට නත්තල් ගහක් සැරසීම ගැන තියෙන මුල්ම මතකය..

පස්සේ හැම අවුරුද්දෙම මට කොහෙන් කොහෙන් හරි සයිප්‍රස් අතු ලැබුනා.. සමහර අවුරුදු වල නොලැබුනාම සැරසිලි නැතුවම නත්තල ගෙවිලා ගියා.. දැනට අවුරුදු 8 කට විතර කලින් තාත්තා ගෙදර තියන්න ප්ලාස්ටික් ගහක් ගෙනාවා..ඒක නත්තල් ගහක් වගේමයි.. ඉතිං ඒක ගෙනාව දවසේ ඉදං පාවිච්චි වෙන්නේ නත්තල් ගහ විදියට.. නත්තල් නැති දවස් වලට ගහ දෙකට තුනට කැඩිලා ගෙයි මුල්ලකට යනවා.. නත්තල් එනකොට එළියට එනවා... දැන් නම් බැලුම් බෝල කාඩ් එල්ලන්නේ නැහැ.. නත්තල් සැරසිලි කිහිපයකුයි.. වෙසක් පොසොන් වලට දැල්වෙන පුංචි විදුලි බුබුළු වැලකුයි තමයි පාවිච්චියට ගැනෙන්නේ..

මම කතෝලික නොවන නිසා නත්තල් ගහේ ඉතිහාස කථාව හෝ එය සැකසෙන අරමුණ හෝ මම දන්නේ නෑ.. අනික මම ඒ දේ කරන්නේ කවුරුවත් කරන්නන් වාලේත් නෙවෙයි.. මම ‍ඒ දේ කරන්නේ මම හැමවෙලේම අගය කරන මගේම සතුට වෙනුවෙන්.. නත්තල් ගහ සරසන හැමවෙලාවකමයි..සිංහල අවුරුද්දට කැම මේසේ සකසන වෙලාවටයි.. වෙසක් පෝය දවසට වෙසක් කූඩු එල්ලනකොටයි මගේ හිතේ ඇති වෙන්නේ එකම වගේ හැගීමක්..ඒක ව‍චනෙන් විස්තර කරන්න මට තේරෙන්නේ නෑ.. නමුත් ඒ හැගීමත් එක්ක මම තෘප්තිමත් වෙනවා...

දැන් කථා ඇති.. කියන්න තියන එකම දේ තමයි..නත්තලේදී වැඩියෙනම කථා වෙන්නේ සාමය ගැන.. මම හිතන්නේ මුලු ලෝකෙම සමරණ එකම උත්සවයත් තත්තලයි නමුත් මුළු ලෝකයටම උවමනාත් සාමයයි.. ඒ සාමය හැකි සෑම දෙනා තුලම වැඩි වර්ධනය වේවා.. සතුට සැනසීම පිරි සුභ නත්තලක් වේවා...!

පසු සටහන-
බ්ලොග් ලියන කතෝලිකයන් ගැන මම වැඩිය දන්නේ නෑ.. දන්න තරමින් ඉන්නේ මගේ ආදරණීය බ්ලොග් මිතුරා නෑෂ් හා හුදෙකලා නොවු සිතුවිලි ලියන ප්‍රියංකර මල්ලි.. ඒ දෙන්නටම සතුට සපිරුණු නත්තලක්.. ඒ හැර අපි හැමෝටමත් හැමදාමත් සතුට සැනසීම හා සාමය උදා වේවා...!